Sekoddeśaḥ
Technical Details
sekoddeśaḥ
om namaḥ kālacakrāya
sucandra āha-
sekaḥ saptavidhaḥ śāstastrividho'nuttarastathā|
laukikottarasiddhyarthaṃ saṃkṣepāt kathayasva me||1||
bhagavānāha-
śṛṇu sucandra sekārthaṃ saptadhā trividhaṃ param|
nāḍīsaṃcāramāyāmamuddeśāt kathayāmi te||2||
uddeśastrividhastantre nirdeśastrividho bhavet|
pratyuddeśo mahoddeśaḥ pratinirdeśako'paraḥ||3||
uddeśa eva nirdeśastantrasaṃgītirucyate|
pratyuddeśaśca nirdeśaḥ pañjikā padabhañjikā||4||
mahoddeśaśca nirdeśaṣṭīkā sarvārthasūcikā|
abhijñālābhibhiḥ sā tu kartavyā naiva paṇḍitaiḥ||5||
evaṃ ṣaṭkoṭibhiḥ śuddhaṃ vajrayogaiścaturvidhaiḥ|
catuḥsambodhibhiḥ skandhadhātvāyatanaṣaṭkulaiḥ||6||
paṭalaiḥ pañcabhiḥ śuddhaṃ lokadhātvādikairmataiḥ|
satyābhyāmādibuddhaṃ syāt kālacakrābhidhānakam||7||
ādau saptābhiṣeko yo bālānāmavatāraṇam|
trividho lokasaṃvṛtyā caturthaḥ paramārthataḥ||8||
satyadvayena dharmāṇāṃ deśanā vajriṇo mama|
lokasaṃvṛtisatyena satyena paramārthataḥ||9||
udakaṃ mukuṭaḥ paṭṭo vajraghaṇṭā mahāvratam|
nāmānujñāsamāyuktaḥ sekaḥ saptavidho nṛpa||10||
kāyavākcittasaṃśuddhirabhiṣekadvayaṃ dvayam|
anujñā jñānaśuddhiḥ syādanyā dhātvādiśuddhitaḥ||11||
udakaṃ dhātusaṃśuddhirmaulī skandhaviśodhanam|
paṭṭaḥ pāramitāśuddhirvajraghaṇṭā mahākṣaram||12||
buddhabhāṣā na vicchinnā arkendvekatraśodhanam|
viṣayendriyasaṃśuddhiḥ syādvajravratamacyutam||13||
nāma maitryādiśuddhiḥ syādanujñā buddhaśodhanam|
ete sapta sekā deyā vartayitvā tu maṇḍalam||14||
kumbho guhyābhiṣekaśca prajñājñānābhidhānakaḥ|
punareva mahāprajñā tasyā jñānābhidhānakaḥ||15||
kṣaraḥ kṣarastataḥ spando niḥspandaśca tato'paraḥ|
kāyavākcittasaṃśuddhyā abhiṣekatrayaṃ kramāt||16||
caturtho jñānasaṃśuddhiḥ kāyavākcittaśodhakaḥ|
bālaḥ prauḍhastathā vṛddhaścaturthastu prajāpatiḥ||17||
prajñāstanāṅgasaṃsparśād bodhicittacyutaṃ sukham|
payodharābhiṣiktaḥ sa bālaḥ prāptaṃ yataḥ sukham||18||
guhyāsphālāccirājjātaṃ bodhicittacyutaṃ sukham|
prauḍho guhyābhiṣiktaḥ sa guhyāt prāptaṃ yataḥ sukham||19||
guhyāsphālāccirājjātaṃ vajrāgre spandataḥ sukham|
prajñājñānābhiṣiktaḥ sa vṛddhaḥ spandaṃ gato yataḥ||20||
mahāmudrānurāgādyajjātaṃ niḥspandataḥ sukham|
mahāprajñābhiṣiktaḥ sa yato niḥspandatāṃ gataḥ||21||
prajāpatiḥ sa vijñeyo janakaḥ sarvatāyinām|
vajrasattvo mahāsattvo bodhisattvo'dvayo'kṣaraḥ||22||
asau samayasattvaḥ syādvajrayogaścaturvidhaḥ|
kālacakra iha khyāto yogināṃ muktidāyakaḥ||23||
asyaiva sādhanaṃ kuryāt pratibhāsairacintitaiḥ|
dhūmādibhirnimittaistaiḥ prajñābimbairnabhaḥsamaiḥ||24||
astināstivyatikrāntaiḥ pratyayārthaiḥ svacetasaḥ|
paramāṇurajaḥsaṃdohaiḥ sarvataḥ parivarjitaiḥ||25||
dhūmamarīcikhadyotadīpajvālendubhāskaraiḥ|
tamaḥ kalā mahābindurviśvabimbaṃ prabhāsvaram||26||
pihitāpihitanetrābhyāṃ śūnye yannānukalpitam|
dṛśyate svapnavad bimbaṃ tad bimbaṃ bhāvayet sadā||27||
abhāve bhāvanā bimbe yogināṃ sā na bhāvanā|
bhāvo'bhāvo na cittasya bimbe'kalpitadarśanāt||28||
pratisenāṃ yathādarśe kumārī paśyedavastujām|
atītānāgataṃ dharmaṃ tattvayogyambare tathā||29||
asyā bhāvo na bhāvaḥ syādvastuśūnyārthadarśanāt|
vastuno'bhāvato'rtho'sti māyāsvapnendrajālavat||30||
asati dharmiṇi hyeṣa dharmotpādaḥ pradṛśyate|
cintāmaṇirivānantasattvāśāparipūrakaḥ||31||
adṛṣṭaṃ pratisenāyāṃ kumārī caurādi paśyati|
tat prādeśikanetrābhyāṃ gatvā paśyanti sādhakāḥ||32||
yadi paśyati sadrūpaṃ svamukhaṃ kiṃ na paśyati|
yadi paśyatyasadrūpaṃ śaśaśṛṅgaṃ kathaṃ na ca||33||
na paśyatyanyacakṣurbhyāṃ svacakṣurbhyāṃ na paśyati|
dṛśyamānamajātaṃ tat kumāryā jātakaṃ yathā||34||
dṛṣṭe bimbe tataḥ kuryāt prāṇāyāmaṃ nirantaram|
urdhvādhastriṣu nāḍīṣu kāyavākcittarodhanāt||35||
candrārkarāhuviṇmūtraśukramārgapravāhiṣu|
toyāgniśūnyabhūvāyujñānadhātukajātiṣu||36||
candrasūryataminyo yāḥ kāyavākcittanāḍikāḥ|
viṇmūtraśukravāhinyaḥ prāṇe'pāne krameṇa tāḥ||37||
[candraḥ kāya] upāyasya prajñāyā vāgdivākaraḥ|
prajñākāyastu viṇ[nāḍī virbhorvāṅmūtravā]hinī||38||
urdhvādhaścittanāḍyau dve taminīśukravāhinyau|
taminī cittamupāyasya prajñāyāḥ śukravāhinī||39||
ūrdhvādhaḥ ṣaṭkulaṃ hyetat kāyavākcittayogataḥ|
prajñopāyāṅgabhāvena saṃsthitaṃ sarvadehinām||40||
ariṣṭaṃ kāyavāṅnāḍyorūrdhvā[dho']dhikamārutaiḥ|
taminīśukravāhinyorutpattimaraṇasthitiḥ||41||
utpāde mṛtyukāle ca maithune śukravāhinī|
taminī ca vahatyūrdhve saṃkrāntau viṣuve raveḥ||42||
lagnodayābhisaṃdhau ca viṣuvaṃ vahati madhye|
[ṣaṭpañcāśat] sapādañca śvāsocchvāsaṃ narādhipa||43||
adhikān pañcasaptatyā ṣaṭśatāṃśca divāniśam|
ekaviṃśatsahasrāṃśca ṣaṭśatairadhikāṃśca yān||44||
vāmā ca dakṣiṇā nāḍī vahatyūnānanena tān|
satripakṣitrivarṣāṇi śatavarṣe hi madhyamā||45||
vāmā savyordhve candrārkau lalaneḍā piṅgalāparā|
toyatejaḥsvabhāvinyau padmadhṛgratnadhṛṅmate||46||
adho viṇmūtravāhinyau pṛthvīvāyusvarūpake|
madhyanāḍī ca vāmā ca [cakradhṛk khaḍgadhṛṅmate]||47||
ūrdhvādho madhyamā savyā rāhuśukrapravāhinī|
śūnya[jñānasvabhā]vinyau vajradhṛgvajradhṛṅmate||48||
viṇnāḍī candramārgeṇa raviṇā mūtravāhinī|
jātau mṛtyau viṣuve rāge rāhuṇā śukravāhinī||49||
yā nābhyūrdhve'vadhūtī sā suṣumnā tamovāhinī|
yā'dhaḥ khagamukhā sā ca śaṅkhinī śukravāhinī||50||
nābhyabje hṛdaye kaṇṭhe lalāṭoṣṇīṣapaṅkaje|
bhūtoyāgnimarucchūnyaṃ saṃhāreṇa pravāhinī||51||
nirgacchantī viśantī [sā] sṛṣṭinā viśati kṣitau|
karṇikāt karṇikāmadhye'vadhūtyā gatirāgatiḥ||52||
nābhau guhye ca maṇyabje kāyavākcittavāhinī|
nirgacchantī viśantī sā saṃhārasṛṣṭirūpiṇī||53||
śaṅkhinī sarvajantūnāmapānānilavāhikā|
eṣā strīṇāṃ sukhācchukraṃ ṛtau raktapravāhinī||54||
prajñopāyāṅgabhāvena ūrdhve savyāvasavyayoḥ|
adho viṇmūtravāhasya rajaḥśukra[pravāhayoḥ]||55||
caṇḍālī rajaso vāhāt khagamukhā śukravāhataḥ|
ūdhve ṛtau smṛ[tā strīṇāṃ ḍombī puṃ]so'vadhūtikā||56||
vijñānādyaṃ sadā vāme nāḍyāṃ maṇḍala[pañcakam|
bhūmyādi]dakṣiṇe nāḍyāṃ madhye vahati ṣaṣṭhamam||57||
nābhipadmadale ṣaṣṭi maṇḍalāni yathākramam|
vāme ca dakṣiṇe lagne meṣādye vṛṣabhādike||58||
mūle v[āme tataḥ savya ūrdhve] madhye[']nilaḥ kramāt|
ekaikamaṇḍalaṃ daṇḍādbhūmyādyaṃ nāsarandhrayoḥ||59||
nāḍikā vahati śvāsān saṣaṣṭitriśatān kramāt|
aṣṭādaśaśataśvāsānnāḍyaḥ pañca vahanti tān||60||
ṣaṣṭi nāḍyo divārātraṃ maṇḍalānīti dehataḥ|
dalamadhye tataḥ pūrve savye vāme'pare kramāt||61||
ākāśādyaṃ sadā vāme bhūmyādyaṃ dakṣiṇe'parāt|
vijñānādibhavo vāme saṃhāraḥ kṣmādi dakṣiṇe||62||
apare pūrve dharā vāyuḥ prajñopāyaḥ parasparam|
aṅguṣṭhānāmikādvābhyāṃ yato vaktre'bhiṣiñcanam||63||
savye vāme havistoyaṃ prajñopāyaḥ parasparam|
madhyamātarjanīdvābhyāṃ yataḥ khaḍgo bhaviṣyati||64||
ardhacandrākṛtirmudrā daṃṣṭrā kartī kanīyasī|
śūnyamakṣaramūrdhvādhaḥ prajñopāyaḥ parasparam||65||
daśamaṇḍalasaṃyoge aṅgulīnāṃ parasparam|
karatale puṭite mūrdhni ekaśūkaṃ sakartikam||66||
viṣuvattanmadhye nāḍyāṃ sṛṣṭisaṃhārakārakam|
skandhadhātutrivajrāṇāmekatvaṃ madhyamāgatau||67||
candrārkanāḍikāruddhe ruddhā viṇmūtranāḍikāḥ|
rāhunāḍīvi(ni)ruddhe syādruddhā'dhaḥ śukravāhinī||68||
mukte muktā bhavantyetāḥ sṛṣṭisaṃhārakārikāḥ|
saṃcāra eṣa nāḍīnāṃ prāṇāpānatrimārgataḥ||69||
vāmāyāṃ dakṣiṇāyāṃ vā pravahatyadhiko[']nilaḥ|
ekarātraṃ tathā pañca trivarṣairmara[ṇaṃ] tataḥ||70||
pañca diktithayo viṃśati tattvānyekottaraṃ kramāt|
trayastriṃśaddinārohaḥ ariṣṭaṃ dakṣiṇe ravau||71||
tridvyekasamakairmāsaiḥ ṣaṭtriyugmendubhirdinaiḥ|
tithidikpañcaguṇadvyekairāyurgacchati dehinām||72||
mūlādekottareṇa syādvāme candrasya rohaṇam|
[dinairmāsairdinairmāsais] tridināni dvimāsakau||73||
dine'riṣṭaṃ śubhe māse vṛddhihānistatastayoḥ|
madhyamārohaṇaṃ mṛtyoḥ śatābdaparipūrṇataḥ||74||
samaviṣamadinaistasya janmajāto'tha maṇḍalaiḥ|
rohaṇaṃ savyavāme ca pakṣadvayavināśanāt||75||
anyathā maraṇaṃ na syā [t pakṣadvayasya] saṃsthiteḥ|
savyāvasavyasaṃcārā [ta] pañcamaṇḍalavāhataḥ||76||
ariṣṭalakṣaṇaṃ jñātvā prāṇaṃ bindau niveśayet|
avadhūtīpadamāśritya [bhāvayet] paramākṣaram||77||
vajrotthānaṃ sadā kuryāccandrārkagatibhañjanāt|
anyathā nāvadhūtyaṅge viśati prāṇamārutaḥ||78||
apāno'dhaśca śaṅkhinyāṃ maraṇaṃ tadaveśataḥ|
ariṣṭavañcanaṃ hyetadānandairyogināṃ bhavet||79||
śukrāgamanamānandamuṣṇīṣādūrṇṇāpaṅkaje|
kaṇṭhe hṛdi paramānandaṃ viramānandaṃ tato bhavet||80||
vividhaṃ ramaṇaṃ nābhau guhyapadme yadāgatam|
guhyādvajramaṇiṃ yāvat sahajānandamacyutam||81||
apratiṣṭhitanirvāṇaṃ mahārāgo'kṣaraḥ prabhuḥ|
virāgādyaccyutaṃ saukhyaṃ tannirvāṇaṃ pratiṣṭhitam||82||
śukrendūdaya uṣṇīṣe pūrṇā guhye saroruhe|
kalā ṣoḍaśamā yā sā maṇipadme vajramūrdhagā||83||
tadūrdhvaṃ cyutikālaḥ syāt kṛṣṇapratipadāgame|
ravistūrṇāpadaṃ yāti amāvasyāṃ virāgataḥ||84||
kalā ṣoḍaśamā tasya uṣṇīṣakamale gatā|
naṣṭacandra ihākhyāto viraktī rāgasaukhyataḥ||85||
adhaścandrāmṛtaṃ yāti maraṇe sarvadehinām|
ūrdhve sūryarajo rāhuvijñānaṃ bhāvalakṣaṇe||86||
ataścandrāmṛtasyordhve kartavyaṃ gamanaṃ nṛpa|
adho'rkarajaso rāhuvijñānasyākṣare sukhe||87||
ūrṇṇābje sarvabuddhānāṃ candrāmṛtasya pūrṇimā|
amā'rkarajaso guhye kaloṣṇīṣe maṇau tayoḥ||88||
iti vajrapadaṃ śāsturviparītaṃ sarvadehinām|
apratiṣṭhitanirvāṇādviparītaṃ yānti dhātavaḥ||89||
maṇau cittaṃ [ca] guhye vākkāyo nābhau mahāsukhāt|
dharmasambhoganirmāṇāḥ śuddhakāyāt spharantyamī||90||
adhopāyasya rājendra prajñā[yā] ūrdhvato bhavet|
lalāṭe kāyavajramasyā grīvahṛnnābhipaṅkaje||91||
vākcittajñānavajrāṇi nirmāṇādyāt spharantyamī|
spharaṇaṃ skandhadhātūnāṃ nirāvaraṇataḥ sukhāt||92||
karmamudrāsamāpattyā jñānamudrāvalambanaiḥ|
mahāmudraikayogena vṛddhiṃ yāti tadakṣaram||93||
vṛddhasya na ca syāt vṛddhiḥ kṣīṇasya kṣīṇatā na ca|
astaṃgatasya nāstamanamuditasyodayaṃ na hi||94||
na prakāśaḥ prakāśasya pihitaṃ pihitasya na|
jātasyaiva na janma syān mṛtasya maraṇaṃ na ca||95||
muktasya na ca muktiḥ syādasthitasya ca cāsthitiḥ|
abhāvo na hyabhāvasya bhāvo bhāvasya naiva ca||96||
kṣarasyāpi kṣaro na syādakṣarasya na cākṣaraḥ|
svabhāvābhāvadharmāṇāṃ māyotpādaḥ kṣayastathā||97||
na kṣayaṃ yānti bhūtāni na jāyante svabhāvataḥ|
niḥsvabhāvamidaṃ viśvaṃ bhāvābhāvaikalakṣaṇam||98||
svaprajñāliṅgitaṃ cittaṃ padme vajramaṇau gatam|
tatra candragataspando niḥspandākṣarabhāvanā||99||
kāyavākcittanāḍīṣu kāyavākcittabhāvanā|
samāhārastrivajrāṇāṃ śaṅkhinyāṃ jñānabhāvanā||100||
prajñārāgadrutānāṃ ca bindūnāṃ śirasaḥ kramāt|
pūrṇāpadaṃ praviṣṭānāṃ bandhanaṃ paramārthataḥ||101||
yathoditaḥ kramāccandraḥ kalābhiryāti pūrṇatām|
vāsanāharaṇaṃ pūrṇā [na] candracchedo na pūraṇam||102||
tathoditaṃ kramājjñānaṃ bhūmibhiryāti pūrṇatām|
kleśādyāharaṇaṃ pūrṇā [na] jñānacchedo na pūraṇam||103||
yathā madhyaśaśāṅkena pūrṇāyāṃ na sthiraḥ śaśī|
saṃsāravāsanāṅkena tathā cittaṃ sukhe'kṣare||104||
utpattiḥ pralayaḥ pakṣaḥ [śuklaḥ] kṛṣṇaḥ pratiṣṭhitaḥ|
tayormadhye tu yā pūrṇā sā pūrṇā na pratiṣṭhitā||105||
ekakṣaṇābhisambuddhaṃ pūrṇāyāṃ niścalaṃ bhavet|
yadā vajramaṇau citaṃ tat sarvakṣaṇapūrakam||106||
na sthitiḥ śuklapakṣe'sya gamanaṃ nāsite kvacit|
pakṣadvayasya madhyasthaṃ pūrṇāyāṃ gatamadvayam||107||
uṣṇīṣādudayaṃ tasya pūrṇā vajramaṇau bhavet|
savirāgāt kalāhāni [ r ] vajrāddhāneḥ prapūrṇatā||108||
uṣṇīse hyudayo bhūyaḥ pūrṇā vajramaṇau punaḥ|
savirāgāt kalāhānirjñānahānirna dehinām||109||
mahāsukhasvabhāvo[']sya pūrṇāśabdena gīyate|
anyabhāvāntaraṃ sarvaṃ sṛṣṭisaṃhārahetukam||110||
bhavādgacchati nirvāṇaṃ tasmādeti punarbhavam|
svapakṣābhyāṃ yathāṃ candro'yanābhyāṃ bhāskaro yathā||111||
pūrṇāyāṃ niścalasyāsya bhūmibhiḥ paripūrṇatā|
dvyayutadvyaṣṭaśataiḥ śvāsairakṣarakṣaṇabhakṣitaiḥ||112||
pakṣadvayaṃ vyatikramya bhūmibhiḥ paripūritam|
dvādaśākārasatyārthaṃ ṣoḍaśākāramakṣaram||113||
bhūmibhirdvādaśākāraṃ pūritaṃ paramādvayam|
kalābhiḥ pūritaṃ cittaṃ ṣoḍaśākāramakṣaram||114||
ekārthamadvayaṃ dharmaṃ paramārthamavinaśvaram|
pūrṇāvasthāṃ gataṃ cittaṃ āsamantāt prapūritam||115||
virāgādimahārāgaṃ vajrānaṅgaṃ mahākṣaram|
paripūrṇamasaṃkliṣṭaṃ pakṣadvaya[sya] vāsanaiḥ||116||
yathā nadyudakaṃ viṣṭaṃ samudre tatpayaḥsamam|
tathā bhāvasamūho'yamakṣare tatsamo[']kṣaraḥ||117||
yathā dhātusamūho[']yaṃ rasatvaṃ yāti bhakṣitaḥ|
bījairbījasva bhāvaṃ ca phalakāle mānavarjitam||118||
evaṃ bhāvasamūho'pi paramākṣarabhakṣitaḥ|
paramākṣaratāṃ yāti sarvākārasvarūpadhṛk||119||
na daṃśe vedanāṃ vetti nānyatra cāpi daṣṭakaḥ|
na viṣayānindriyadvāraiḥ pūrṇāvasthāṃ viṣe gate||120||
evaṃ na ca maṇau yogī nānyatra vetti satsukham|
na viṣayānindriyadvāraiścitte pūrṇakalāṃ gate||121||
yathā lohaikadeśe'pi saṃsthito hi mahārasaḥ|
lohaṃ tīvrāgnisaṃtaptaṃ vedhayedāsamantataḥ||122||
tethaivaikapradeśe'pi saṃsthitaṃ sukhamakṣaram|
cittaṃ kāmāgnisaṃtaptaṃ vedhayedāsamantataḥ||123||
yathā ca viddhalohānāṃ naiva malo bhavet kvacit|
tathā ca viddhacittānāṃ na vāsanā bhavet kvacit||124||
hematvaṃ hi gataṃ lohamagninā nirmalaṃ bhavet|
bhūyo bhūyastathā cittaṃ nirmalaṃ rāgavahninā||125||
yathā mahāmaṇisparśādyāti śīlā pradīptatām|
tathākṣarasukhasparśāt sukhatāṃ cittameti vai||126||
kimatra bahunoktena lokasaṃvṛtisatyataḥ|
avitarkyo rasasadbhāvo lohasyāvedhanaṃ prati||127||
vitarkyo jñānasadbhāvaḥ kiṃ punaḥ paramārthataḥ|
malāgantukaliptasya cittasyāvedhanaṃ prati||128||
nāgantuko malaścitte na cittāccirakālikaḥ|
na cittena vinā jāto na citte saṃsthito'vyayaḥ||129||
yadyāgantuka eva syāccittaṃ prāgamalaṃ tadā|
cirakālī yadā cittāttasyaiva sambhavaḥ kutaḥ||130||
yadi cittaṃ vinā jātastadā khakusumaṃ yathā|
yadi sthitaḥ sadā citte na naśyet sarvatastadā||131||
tāmrasya kālimā yadvadrasayogena naśyati|
na tasya sattvatā naśyennirmalatvena yā sthitā||132||
tadvaccittamalaḥ śūnyatāyogena praṇaśyati|
na tasya jñānatā naśyennirmalatvena yā sthitā||133||
rasaviddho yathā loho na punarlohatāṃ vrajet|
sukhaviddhaṃ tathā cittaṃ na punarduḥkhatāṃ vrajet||134||
na virāgāt paraṃ pāpaṃ na puṇyaṃ sukhataḥ param|
ato'kṣarasukhe cittaṃ veśanīyaṃ sadā nṛpa||135||
vaktuṃ na śakyate saukhyaṃ kumāryā surataṃ vinā|
yauvane surataṃ prāpya svato vetti mahāsukham||136||
evaṃ na śakyate vaktuṃ samādhirahitaiḥ sukham|
samādhāvakṣaraṃ prāpya svato vindanti yoginaḥ||137||
akṣarajasukhajñāne sarvajñairapi śaṃkyate|
tathā kvacinna kartavyo virāgo manaso'sukhāt||138||
cyutervirāgasaṃbhūtirvirāgādduḥkhasaṃbhavaḥ|
duḥkhāddhātukṣayaḥ puṃsāṃ kṣayān mṛtyuriti smṛtaḥ||139||
mṛtyoḥ punarbhavasteṣāṃ bhavān mṛtyuścyutiḥ punaḥ|
evaṃ virāgasaṃbhūteḥ sattvānāṃ nānyathā bhavaḥ||140||
tasmāt sarvaprayatnena cyutirāgaṃ vivarjayet|
yenākṣarasukhaṃ yāti yogī saṃsārabandhanāt||141||
kāmuko'pi virāgānna kāmaśāstraṃ samīhate|
mayokte kiṃ punastantre yogī duḥkhaṃ samīhate||142||
śukrākṣarasvabhāvena sādhayet paramākṣaram|
ādhāre cyutimāpanne ādheyasya virāgatā||143||
ādhārādheyasaṃbandho yāvannākṣaratāṃ vrajet|
cittamakṣaratāprāptaṃ nādhārādheyalakṣaṇam||144||
akṣarodbhavakāyasya ūrṇṇācakragatasya tu|
ālikālisamāyogo hūṃkāro neṣyate nṛpa||145||
bimbaṃ śūnyodbhavaṃ hetuḥ phalamakṣarajaṃ sukham|
phalena mudrito heturhetunā mudritaṃ phalam||146||
śūnyatā bimbadhṛgghetuḥ karuṇākṣaradhṛk phalam|
śūnyatākaruṇābhinnaṃ bodhicittaṃ tadacyutam||147||
nirvāṇarahitaṃ bimbaṃ saṃsārātītamakṣaram|
śāścatocchedanirmuttastatoryogo'dvayo'paraḥ||148||
abhāvo nāsti bimbasya abhāvodbhūtalakṣaṇāt|
bhāvo nāstyakṣarasyāpi bhāvasambhūtalakṣaṇāt||149||
bhāvābhāvasamāyogo vajrayogo'dvayo'paraḥ|
rūpārūpavinirmuktaḥ pratiseneva darpaṇe||150||
bimbaṃ na bhavamāyāti nāpi nirvāṇamakṣaram|
anyonyāliṅgitaṃ śāntaṃ napuṃsakapadaṃ param||151||
prajñāhetorajātatvāt prajñāhetūdbhavaṃ phalam|
prajñāhetorajātatvāt prajñājātaṃ na hetujam||152||
ato na hetujaṃ jñānaṃ prajñājñānamanuttaram|
phalena hetunānyonyaṃ na parasparamudraṇam||153||
hetuḥ phalaṃ ca yat sarvaṃ tat pratītyasamudbhavam|
anyonyamudritaṃ bimbaṃ notpannaṃ na ca nirvṛtam||154||
prajñā cātyantanirvṛtā utpannaśca paro'kṣaraḥ|
hetuphalavinirmuktirna parasparamudraṇam||155||
ajātasyāniruddhasya yajjñeyasyeha darśanam|
tat svacittasya nānyasya bāhyajñeyavibhāgataḥ||156||
ato na cātmanātmānaṃ mudrituṃ śakyate kvacit|
kiṃ chinatti mahākhaḍga ātmānamātmadhārayā||157||
bandhyāduhitṛsaṃgena svapne saukhyaṃ yathā bhavet|
gaganodbhavabimbena sevitena tathātmanaḥ||158||
na prajñā nāpyupāyo'sau sahajaḥ prajñayā saha|
āpūrṇaścaiva saukhyena sarvāvaraṇavarjitaḥ||159||
ākāśavannirāvaraṇo viṣayendriyavarjitaḥ|
sarvataḥ sarvabhūtastha acchedyo bhedavarjitaḥ||160||
svayambhūrvajrasattvo'sau mahārthaḥ paramākṣaraḥ|
mahārāgo mahāsattvaḥ sarvasattvaratiṃkaraḥ||161||
bodhisattvo mahādveṣaḥ kleśakṣayī mahāripuḥ|
samayasattvo mahāmoho mūḍhadhīmohasūdanaḥ||162||
vajrayogo mahākrodhaḥ kruddhamāramahāripuḥ|
kālacakro mahālobhaḥ kṣaralobhaniṣūdanaḥ||163||
vajramabhedyamityāha mahārthaṃ bhagavāniha|
sattvaṃ tribhavasyaikatā taduktaṃ paramākṣaram||164||
paramākṣarasukhāpūrṇo bhūmibhiḥ paripūritaḥ|
mahārāgo mahāsattvaḥ sarvasattvaratiṃkaraḥ||165||
bodhau vyavasthitaḥ sattvo bodhisattvastato'calaḥ|
kleśādidveṣasaṃghānāṃ mahādveṣo mahāripuḥ||166||
samayaścandrāmṛtaṃ śukramacyutistasya bhakṣaṇam|
samayasattvo'nayā vṛttyā mūḍhadhīmohasūdanaḥ||167||
ekatvaṃ sarvavajrāṇāṃ prajñākāyākṣaraiḥ saha|
mahākrodho mahāśatrurmārāṇāṃ krodharūpiṇām||168||
mahākṣarasukhopāyāt sattvārthaṃ na tyajet kvacit|
sattvān moktuṃ mahālobhaḥ kṣaralobhaniṣūdanaḥ||169||
ete hyuktāḥ ṣaḍākārā akṣarajñānavedanā|
vijñānarūpasaṃskārasaṃjñāḥ skandhakulāni te||170||
jñānāgnyambarapṛthivīvāyūdakā yathākramam|
manaścakṣuḥśrutikāyanāsajihvāstathaiva ca||171||
śabdarasadharmadhātukagandhaspraṣṭavyarūpiṇaḥ|
krodharāṭ ṣaṇmukho bhīmaḥ ṣaṭkulaiḥ pariśodhitaḥ||172||
kāyaguhyendriyacittaṃ trividhaṃ maṇḍalaṃ sadā|
prajñopāyatrivajrāṇāṃ jāyate vajrasattvatā||173||
idaṃ sekasya sādhanaṃ paramākṣarasādhanam|
nāḍīkulasamāyuktamuddeśāccandra bhāṣitam||174||
[iti śrīsekoddeśaḥ samāptaḥ]